Elm və Təhsil Nazirliyi ilə “Microsoft” arasında həyata keçirilən əməkdaşlıq çərçivəsində ali təhsil müəssisələrində rəqəmsal transformasiya işləri davam etdirilir.

Sumqayit.tv xəbər verir ki, layihə çərçivəsində Sumqayıt Dövlət Universitetində də “Microsoft”un lisenziyalı rəqəmsal həlləri istifadəyə verilib.

Nazirlikdən verilən məlumata görə, həyata keçirilən əməkdaşlığın əsas məqsədi universitetlərin müəllim, tələbə və inzibati heyətinin müasir rəqəmsal alətlərə çıxış imkanlarını genişləndirmək, tədris və idarəetmə prosesində innovativ texnologiyaların tətbiqini sürətləndirməkdir.

Qeyd olunub ki, ümumilikdə 20 ali təhsil müəssisəsinin “Microsoft” platforması ilə təmin olunması nəzərdə tutulur. Hazırda Sumqayıt Dövlət Universiteti daxil olmaqla bir sıra ali təhsil müəssisələrində bütün texniki və təşkilati işlər yekunlaşdırılıb.

Məlumata əsasən, “Microsoft Copilot” kimi süni intellekt əsaslı alətlər müəllimlərə dərs planlarının hazırlanması, tədris materiallarının yaradılması və qiymətləndirmə prosesində əlavə imkanlar təqdim edir. Bunun tədris keyfiyyətinin artırılmasına və müəllimlərin iş yükünün optimallaşdırılmasına töhfə verəcəyi bildirilir.

Nazirlik hesab edir ki, layihə ali təhsil sistemində rəqəmsal bacarıqların inkişafı və innovativ texnologiyaların tədris mühitinə inteqrasiyası baxımından mühüm əhəmiyyət daşıyır.

3-06-2026, 18:49 66