“Amerikanın əsas hədəfi İranın nüvə potensialının qarşısını almaq, raket proqramlarını dayandırmaq, regionda İranın hərbi təsirini zəiflətmək, Yaxın Şərqdə müttəfiqlərini qorumaq və İrana bağlı proksi qüvvələrin təsirini azaltmaq idi”

Sumqayit.tv xəbər verir ki, bu sözləri Yenicag.az-a açıqlamasında politoloq Elçin Abdullayev bildirib.

Politoloq açıqlamasında ABŞ-İran müharibəsinin qalibinin kim olduğunu analiz edib:

“Belə vəziyyətlərdə kimin qalib gəlməsi sualının cavabı adətən birmənalı olmur. Ona görə ki, nəticə təkcə hərbi deyil, həm də siyasi və strateji ölçülərlə qiymətləndirilməlidir. Bunun üçün çox geniş təhlilə ehtiyac var. Sözügedən müharibəni balanslı şəkildə təhlil etsək, görəcəyik ki, genişmiqyaslı müharibə tam baş verməyibsə və tərəflər arasında atəşkəsə gedilibsə, bu, çox vaxt heç bir tərəfin tam üstünlük qazana bilmədiyini göstərir.

Atəşkəsin elan olunması isə bəzən hər iki tərəfin əlavə ziyanlardan qaçması üçün seçilən kompromis yoludur. Belə olduqda, atəşkəsdən sonra hər iki tərəfin ‘biz qalib gəldik!’ deməsi daxili rəyə hesablanır. Adətən bu cür hallarda qalibi yalnız bu formada müəyyən edə bilərik: Kim əsas məqsədinə yaxınlaşdı? Bu sualın cavabını tapa bilsək, qalibi də müəyyənləşdirə bilərik. Gəlin bunu analiz edək:

ABŞ-nin İsraillə bərabər İrana qarşı başladığı müharibədə əsas məqsədi nədən ibarət idi? Amerikanın əsas hədəfi İranın nüvə potensialının qarşısını almaq, raket proqramlarını dayandırmaq, regionda İranın hərbi təsirini zəiflətmək, Yaxın Şərqdə müttəfiqlərini qorumaq və İrana bağlı proksi qüvvələrin təsirini azaltmaq idi.

ABŞ məqsədlərinə çata bildimi? Müharibənin nəticələrinə baxdıqda görürük ki, Vaşinqton İranın ali rəhbəri daxil olmaqla əksər rəhbər şəxslərini məhv edə bildi. Eyni zamanda, İranın hərbi anbarlarının böyük əksəriyyətini vurub sıradan çıxartdı. Bu nəticə göstərir ki, ABŞ öz məqsədlərinə kifayət qədər yaxınlaşa bildi.

İranın əsas məqsədi isə xarici müdaxilənin qarşısını almaq, daxili sabitliyi saxlamaq, regional təsirini qorumaq və proksi qüvvələrə təsir imkanlarını əldə saxlamaq idi. Hesab edirəm ki, İran xarici müdaxiləyə qarşı müəyyən həmrəylik nümayiş etdirə bildi və daxili sabitliyi hələ ki, qoruyur. Ümumiyyətlə, bunlara nəzər saldıqda məlum olur ki, İran öz minimal məqsədlərini qoruya bildi.

Nəticədə, İran məqsədinə nisbətən nail oldusa, ABŞ maksimum nəticələrə çata bilmədi. Lakin Amerika İran üzərindəki təzyiqini saxlamaqda davam edəcək”.

10-04-2026, 15:31 216