Prezident İlham Əliyevin 2025-ci ilin idman yekunlarına həsr olunan mərasimdəki çıxışı bir daha göstərdi ki, Azərbaycanda idman təkcə fiziki fəaliyyət sahəsi deyil, strateji dövlət siyasətinin ayrılmaz tərkib hissəsidir. Dövlət başçısının səsləndirdiyi faktlar və verdiyi mesajlar idmanın ölkənin beynəlxalq nüfuzunun möhkəmləndirilməsində, gənc nəslin formalaşmasında və ümumi inkişaf strategiyasında oynadığı mühüm rolu aydın şəkildə ortaya qoyur.

2025-ci il Azərbaycan idman tarixinə rekord göstəricilərlə daxil olub. İl ərzində idmançılarımız beynəlxalq yarışlarda 2000-dən çox medal, o cümlədən 600-dən artıq qızıl medal qazanıblar. Bu rəqəmlər təkcə statistik göstərici deyil, illərdir ardıcıl şəkildə həyata keçirilən dövlət siyasətinin real nəticəsidir. Keçən illə müqayisədə medalların sayının artması idmanın inkişafına göstərilən diqqətin və yaradılan şəraitin təbii nəticəsi kimi qiymətləndirilə bilər.

Azərbaycanda idmanın inkişafı məqsədilə son illərdə demək olar ki, sıfırdan formalaşdırılmış müasir idman infrastrukturu yaradılıb. Bu gün paytaxtla yanaşı, bölgələrdə də idmanla məşğul olmaq üçün hərtərəfli imkanlar mövcuddur. Gəncə və Yevlax şəhərlərində Olimpiya İdman komplekslərinin istifadəyə verilməsi ilə bölgələrdə bu tip komplekslərin sayı 46-ya çatıb. Bu isə regionların sosial inkişafı ilə idman siyasətinin vəhdət təşkil etdiyini təsdiqləyir.

Prezident İlham Əliyev çıxışında xüsusilə vurğulayıb ki, sağlam gənc nəsil ölkənin gələcək inkişafının əsas təminatıdır. Uşaqlıqdan idmana cəlb olunan gənclər təkcə idman uğurları üçün deyil, həm də fiziki və mənəvi baxımdan sağlam cəmiyyətin formalaşması üçün vacibdir. Bu baxımdan idman həm sağlam həyat tərzinin, həm də sosial məsuliyyətli vətəndaş yetişdirilməsinin mühüm vasitəsidir.

Dövlət başçısının qeyd etdiyi kimi, gənclərin sağlam ruhda və vətənpərvərlik ideyaları əsasında tərbiyə olunması dövlət siyasətinin prioritet istiqamətlərindəndir. İdman gənclərin fiziki hazırlığı ilə yanaşı, onların mənəvi saflığını, məsuliyyət hissini və Vətənə bağlılığını formalaşdırır. Xüsusilə 44 günlük Vətən müharibəsində qazanılan tarixi Qələbədən sonra idmançılarımız beynəlxalq arenaya müzəffər xalqın nümayəndələri kimi çıxırlar və bu, onların məsuliyyətini daha da artırır.

2025-ci ildə ölkəmizdə keçirilən MDB ölkələrinin üçüncü Oyunları Azərbaycanın idman potensialını bir daha nümayiş etdirdi. Yarışların Bakı ilə yanaşı, Gəncə, digər şəhərlər və Xankəndidə keçirilməsi regionların beynəlxalq tədbirlərə ev sahibliyi etmək imkanlarını sübut etdi. Minlərlə xarici qonağın yüksək səviyyəli təşkilatçılıq və qonaqpərvərliklə tanış olması Azərbaycanın beynəlxalq imicinə mühüm töhfə verdi.

Eyni zamanda, Bakıda ilk dəfə keçirilən UFC beynəlxalq turniri ölkəmizin artıq ən nüfuzlu dünya idman platformalarında da öz yerini tutduğunu göstərdi. Dünya mediasında geniş işıqlandırılan bu yarış Bakı şəhərinin müasirliyini və inkişaf səviyyəsini bir daha ön plana çıxardı.

Prezident İlham Əliyev Formula 1 yarışlarının ölkəmizin tanıdılmasında xüsusi rolunu vurğulayıb. İlk Formula 1 yarışından sonra Azərbaycana gələn xarici turistlərin sayının 20 faiz artması idmanın turizmə verdiyi töhfənin bariz nümunəsidir. Yarım milyardlıq auditoriyaya malik bu yarışlar vasitəsilə Bakı şəhərinin gözəlliyi və ölkənin potensialı bütün dünyaya nümayiş etdirilir.

İlk dəfə olaraq Qusarda, Şahdağ Xizək Kurortunda keçiriləcək Xizək üzrə Dünya Kuboku Azərbaycanın qış idman növləri üzrə də beynəlxalq idman xəritəsində mövqeyini möhkəmləndirir. Şahdağ Turizm Xizək Mərkəzinin davamlı inkişafı, yeni trasların istifadəyə verilməsi və özəl sektorun artan marağı bölgədə minlərlə iş yerinin yaradılmasına səbəb olub.

2025-ci ildə Bakı şəhərinin “Dünyanın İdman Paytaxtı” seçilməsi Azərbaycanda idman sahəsində görülən işlərə verilən yüksək beynəlxalq qiymətdir. Bu ad həm böyük məsuliyyət, həm də qürur mənbəyidir. Prezident İlham Əliyevin qeyd etdiyi kimi, idmançıların və idman mütəxəssislərinin mükafatlandırılması artıq 30 ilə yaxındır davam edən ədalətli və davamlı ənənədir.

Prezident İlham Əliyevin 2025-ci ilin idman yekunlarına həsr olunmuş çıxışı bir daha təsdiqlədi ki, Azərbaycanın idman strategiyası sistemli, davamlı və gələcəyə hesablanmış siyasətdir. İdman sahəsində əldə olunan uğurlar ölkənin beynəlxalq nüfuzunu artırır, gənc nəslin sağlam və vətənpərvər ruhda formalaşmasına xidmət edir və Azərbaycanın güclü dövlət kimi mövqeyini möhkəmləndirir.

Vasif Səfiyarov,

YAP Sumqayıt şəhər təşkilatının məsləhətçisi

29-12-2025, 17:26 971