Sumqayıt şəhəri, 53-cü məhəllədə yerləşən “Fermerlər” MMC-yə məxsus Kənd Təsərrüfatı Məhsullarının Satışı Bazarı Azərbaycan Qida Təhlükəsizliyi Agentliyinin (AQTA) Abşeron–Xızı regional bölməsi tərəfindən yoxlanılıb.
Sumqayit.tv xəbər verir ki, Agentlik monitorinq zamanı qida təhlükəsizliyi sahəsində texniki normativ-hüquqi aktların bir sıra tələblərinin pozulduğunu müəyyən edib.
AQTA-nın məlumatına görə, yoxlama zamanı aşağıdakı nöqsanlar qeydə alınıb:
Süd və süd məhsullarının, eləcə də ət və ət məhsullarının soyuducu vitrinlərdə saxlanılmaması;
Satış üçün nəzərdə tutulan ət hissələrinin asılması üçün istifadə olunan qarmaqların paslanmayan materialdan olmaması;
Bəzi tərəvəzçilik məhsullarının birbaşa döşəmə üzərində saxlanılması;
Satışda olan müxtəlif turşu məhsullarının üzərində etiket məlumatlarının təqdim edilməməsi.
Agentlikdən bildirilib ki, aşkar edilən nöqsanların aradan qaldırılması məqsədilə bazar sahibinə müvafiq göstərişlər verilib.
10-12-2025, 13:45
93
