Dini Qurumlarla İş üzrə Dövlət Komitəsinin sədri Ramin Məmmədov Sumqayıt şəhərində fəaliyyət göstərən bir sıra dini ibadət məkanlarında olub, din xadimləri ilə görüşlər keçirib.

Sumqayit.tv-yə Komitədən verilən məlumata görə, sədr “Cümə” və “Ceyhun xanım və Hacı Əhməd” məscidlərinin, “Müqəddəs Sarovlu Serafim” pravoslav kilsəsinin, eləcə də “Sumqayıt Yəhudiləri” dini icmasının ibadət evinin fəaliyyəti ilə yerində tanış olub.

Görüşlər zamanı Ramin Məmmədov Azərbaycan Prezidenti İlham Əliyevin rəhbərliyi ilə ölkədə dini tolerantlıq və multikulturalizmin dövlət siyasətinin əsas prioritetlərindən biri olduğunu vurğulayıb. O bildirib ki, dini sahədə həyata keçirilən dövlət siyasəti milli maraqlara söykənən, düşünülmüş və uzunmüddətli strategiyanın tərkib hissəsidir və bu yanaşma cəmiyyətdə ideoloji bütövlüyün möhkəmləndirilməsinə xidmət edir.

Komitə sədri qeyd edib ki, dövlət-din münasibətlərində tarazlığın qorunması, radikal meyillərə qarşı preventiv tədbirlərin görülməsi və sağlam dini mühitin təşviqi Azərbaycanın sabitlik və təhlükəsizlik modelinin mühüm elementlərindəndir.

Ramin Məmmədov eyni zamanda sosial şəbəkələrdə dini mövzuların məsuliyyətli şəkildə təqdim olunmasının vacibliyinə diqqət çəkib. Bildirilib ki, rəqəmsal platformalarda dini biliklərin təhrif olunmuş formada yayılması ideoloji risklər yarada bilər. Bu baxımdan din xadimlərinin sağlam dini düşüncənin və milli-mənəvi dəyərlərin təbliğində fəal rol oynamasının əhəmiyyəti vurğulanıb.

Görüşdə iştirak edən din xadimləri ölkədə mövcud birgəyaşayış ənənəsinin davamlı inkişafı, dini icmaların azad və qanunvericiliyə uyğun fəaliyyət göstərməsi üçün yaradılan şərait, eləcə də dövlət-din münasibətlərinin qarşılıqlı hörmət və etimad prinsipləri əsasında qurulmasına görə dövlət başçısına minnətdarlıqlarını ifadə ediblər.

6-02-2026, 12:43 30