Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Sosial Müdafiə Fondu tərəfindən mart ayı üzrə bütün sosial ödənişlər vaxtından əvvəl həyata keçirilib.

Sumqayit.tv xəbər verir ki, bu barədə nazirlik məlumat yayıb.

Bildirilib ki, qarşıdan gələn bayramlarla əlaqədar olaraq bu gün mart ayının müavinət, təqaüd və ünvanlı sosial yardım ödənişləri də vətəndaşların hesablarına köçürülüb.

Qeyd olunub ki, Fond bu ay üzrə bütün sosial ödənişləri qrafikdən əvvəl başa çatdırıb. Belə ki, martın 6-da Bakı və Sumqayıt şəhərlərində, Abşeron rayonunda, eləcə də Naxçıvan Muxtar Respublikasında yaşayan pensiyaçıların pensiyaları ödənilib.

Martın 11-də isə digər bölgələrdə yaşayan pensiyaçıların, həmçinin güzəştli şərtlərlə pensiya təyin edilmiş şəxslərin mart ayı üzrə ödənişləri qrafikdən əvvəl verilib.

Nazirlikdən bildirilib ki, sosial ödənişlərin vaxtından əvvəl həyata keçirilməsi vətəndaşların bayram günlərində sosial təminatının gücləndirilməsi məqsədi daşıyır.

16-03-2026, 20:48 30