Milli Məclisin deputatı Elnarə Akimova 2026-cı ilin aprel ayı üzrə nəzərdə tutulan ilk qəbul günündə Sumqayıt şəhərində vətəndaşlarla növbəti görüşünü keçirib. Bu görüş sadəcə formal qəbul deyil, insanların gündəlik həyatında qarşılaşdıqları çətinliklərin birbaşa dinlənildiyi, problemlərin mahiyyətinə enildiyi canlı dialoq mühiti ilə yadda qalıb.
Sumqayit.tv xəbər verir ki, qəbul zamanı vətəndaşlar onları narahat edən müxtəlif sosial məsələləri diqqətə çatdırıblar. Müraciətlərin əsas hissəsi sosial müavinətlər, təqaüdlərin təyinatı, əlilliyin bərpası, eləcə də son günlərdə intensiv yağıntıların yaratdığı fəsadlarla bağlı problemləri əhatə edib. Səsləndirilən hər bir məsələ diqqətlə dinlənilib, bəzi hallarda yerindəcə izahatlar verilib, digər müraciətlər isə daha dərindən araşdırılması üçün qeydiyyata alınıb.
Görüşdə vurğulanıb ki, vətəndaşların problemlərinin həlli istiqamətində mövcud qanunvericiliyə uyğun olaraq, səlahiyyətlər çərçivəsində konkret addımlar atılacaq. Aidiyyəti qurumlarla əməkdaşlıq edilərək müraciətlərin operativ və effektiv həllinə çalışılacağı bildirilib.
Deputatın sözlərinə görə, bu cür birbaşa görüşlər vətəndaşla dövlət arasında körpü rolunu oynayır. İnsanların problemlərini yerində dinləmək, onları narahat edən məsələləri birbaşa eşitmək və həll yollarını müzakirə etmək həm etimadı möhkəmləndirir, həm də daha çevik qərarların qəbuluna imkan yaradır.
Sumqayıtda keçirilən bu qəbul bir daha göstərdi ki, vətəndaşın səsi diqqətdən kənarda qalmır. Hər bir müraciət arxasında real insan taleyi, gündəlik həyatın çətinlikləri dayanır. Bu müraciətlərə həssas yanaşma isə sosial ədalətin və dövlət-vətəndaş münasibətlərinin əsas göstəricilərindən biridir.

2-04-2026, 15:48 36