Sumqayıt Apellyasiya Məhkəməsi xuliqanlıqda təqsirləndirilən Vəsilə Məlikovanın barəsindəki hökmdən verilən apellyasiya şikayətini təmin etməyib.

Sumqayit.tv xəbər verir ki, hakim Elman Əhmədovun sədrliyi ilə keçirilən məhkəmə iclasında Abşeron Rayon Məhkəməsinin hökmü qüvvədə saxlanılıb.

İttihama görə, hadisə 2024-cü il iyunun 19-da Xırdalan şəhərində yerləşən kafelərdən birində baş verib. Bildirilir ki, Vəsilə Məlikova işıqları söndürərək rəqs etdiyi zaman müştərilərdən biri işıqların yandırılmasını istəyib. Bundan sonra o, masanın üzərində olan boşqabı zərərçəkmişə tərəf atıb.

Nəticədə boşqab qadının ayağına dəyərək ona yüngül bədən xəsarəti yetirib. Hadisə zamanı zərərçəkmişə məxsus 40 manat dəyərində əmlak da yararsız hala düşüb.

Məhkəmə araşdırması zamanı Vəsilə Məlikova özünü təqsirli bildiyini deyib.

Qeyd edək ki, Abşeron Rayon Məhkəməsinin hökmü ilə ona qəti olaraq 2 il 6 ay 3 gün müddətinə azadlıqdan məhrumetmə cəzası təyin edilmiş və məhkəmə zalındaca həbs olunmuşdu. Apellyasiya instansiyası həmin hökmü dəyişdirməyib.//Pravda.az

4-08-2026, 11:34 46