Azərbaycan və Qırğızıstan arasında münasibətlər yeni strateji mərhələyə qədəm qoyub. Bunu YAP İdarə Heyətinin üzvü, YAP Sumqayıt şəhər təşkilatının sədri Ramiz Hüseynov bildirib.
Sumqayit.tv xəbər verir ki, Ramiz Hüseynovun sözlərinə görə, Prezident İlham Əliyevin Qırğızıstana dövlət səfəri iki ölkə arasında əməkdaşlığın müttəfiqlik səviyyəsinə yüksəldiyini nümayiş etdirib.
O qeyd edib ki, səfər çərçivəsində imzalanan sənədlər siyasi, iqtisadi, humanitar və rəqəmsal sahələrdə əməkdaşlığın daha da genişlənməsinə zəmin yaradacaq. Bildirilib ki, Azərbaycan-Qırğız İnvestisiya Fondunun büdcəsinin 200 milyon dollara çatdırılması da iqtisadi əlaqələrin inkişafına mühüm töhfə verəcək.
Ramiz Hüseynov vurğulayıb ki, İssık-Kul sahilində Azərbaycanın sərmayəsi ilə inşa edilən "Bakı" hoteli, eləcə də Ağdamda Qırğızıstanın dəstəyi ilə tikilən "Manas" məktəbi iki qardaş ölkə arasındakı dostluq münasibətlərinin rəmzidir.
YAP rəsmisi əlavə edib ki, Prezident İlham Əliyevin Qırğızıstanın ali dövlət mükafatı – I dərəcəli "Manas" ordeni ilə təltif olunması da ölkələr arasında qarşılıqlı etimadın və yüksək səviyyəli münasibətlərin göstəricisidir.
Ramiz Hüseynovun fikrincə, Azərbaycan və Qırğızıstan arasında formalaşan müttəfiqlik münasibətləri regionda əməkdaşlığın daha da möhkəmlənməsinə və ortaq inkişaf məqsədlərinin həyata keçirilməsinə xidmət edəcək.
3-08-2026, 17:10
43
