Sumqayıtda piyadanın ölümü ilə nəticələnən yol-nəqliyyat hadisəsinə görə məhkum olunan sürücünün cəzası apellyasiya instansiyasında yüngülləşdirilib.

Sumqayit.tv xəbər verir ki, Sumqayıt Apellyasiya Məhkəməsində Allahverdi Hüseynovun barəsindəki hökmdən verilən apellyasiya şikayətinə baxılıb.

Məhkəmənin qərarına əsasən, Sumqayıt Şəhər Məhkəməsinin hökmü dəyişdirilib. Allahverdi Hüseynova 4 il 3 ay 2 gün müddətinə azadlıqdan məhrumetmə cəzası təyin olunub. O, cəzasını məntəqə tipli cəzaçəkmə müəssisəsində çəkəcək.

İttihama görə, Allahverdi Hüseynov 2024-cü ilin noyabr ayında idarə etdiyi "Mercedes-Benz" markalı avtomobillə Sumqayıt şəhərinin Nizami küçəsində hərəkətdə olarkən yol hərəkəti qaydalarını pozaraq yolda dayanmış iki avtomobilə çırpılıb.

Qəza nəticəsində avtomobillər arasında qalan piyada Cavanşir Quliyev ağır xəsarətlər alıb və sonradan xəstəxanada vəfat edib.

Qeyd edək ki, Sumqayıt Şəhər Məhkəməsinin əvvəlki hökmü ilə Allahverdi Hüseynov 5 il 1 ay müddətinə azadlıqdan məhrum edilmişdi. Apellyasiya instansiyası həmin cəzanı azaldıb.//Pravda.az

4-08-2026, 11:49 55