Lütfəliyeva Mina Zakir qızının cinayət işi üzə ibtidai istindaq yekunlaşıb. İstintaq nəticəsində müəyyən olunub ki, paytaxt sakini M. Lütfəliyeva 12 nəfərə qarşı dələduzluq edib.
Sumqayit.tv xəbər verir ki, Unikal.org-un əldə etdiyi məlumatına görə, o, həmin şəxslərdən dövlət orqanlarında işə düzəltmək adı ilə ümumilikdə 120 min manatdan çox pul alıb. M.Lütfəliyevaya Cinayət Məcəlləsinin 178.2.2-ci (dələduzluq - təkrar törədildikdə) maddəsi ilə cinayət işi açılıb.
İşə Səbail Rayon Məhkəməsində hakim Günel Səmədovanın sədrliyi ilə baxılacaq. Hazırlıq iclası iyulun 16-sı saat 10:40-a təyin edilib.
Məhkəmə prosesində zərərçəkmiş qismində Umud Məmmədov, Ayxan Əhmədov, Dilarə Məmmədova, Vəli Təhməzov, Rəfail Orucov, İsmayıl Məhərrəmov, İlham Sadıqov, Günel Qacarova, Nigar Qasımzadə, Nailə Nuriyeva, Hafiz Cəbrayılov, Ceyhun Məmmədov dindiriləcəklər.
Qeyd edək ki, zərəçəkmiş şəxslərin iddialarına görə, Mina Lütfəliyevanı deputat Elnur Allahverdiyev himayə edir.
Məsələ ilə bağlı Unikal.org-a açıqlama verən deputat M.Lütfəliyevanı tanıdığını etiraf edib: “O və həyat yoldaşı mənim seçicimdir. Seçiciləri dinləmək və onların problemlərinə köməklik göstərmək borcumuzdur. Mina Lütfəliyeva ötən ilin yayında göz yaşı içində mənə müraciət edərək haqsız yerə dələduzluqda ittiham olunduğunu bildirib və mən də polisə zəng edərək işə obyektiv baxılmasını xahiş etmişəm. İnsanlar çox şey danışa bilərlər. Mina xanımla başqa heç bir əlaqəm yoxdur”.