Dünya üzrə süni intellekt istifadəçiləri işlərini itirmək ehtimalından çox, çat-botların buraxdığı səhvlərdən narahat olduqlarını bildiriblər.

Sumqayit.tv xəbər verir ki, bu barədə Financial Times süni intellektdən istifadə ilə bağlı aparılan sorğunun nəticələrinə istinadən məlumat yayıb.

Sorğu iştirakçılarının 27 faizi süni intellektin buraxdığı səhvlərdən (“hallüsinasiyalar”) ehtiyat etdiyini bildirib. Respondentlərin 22 faizi iş yerlərinin itirilməsi və insan müstəqilliyinə təsirlə bağlı risklərdən narahat olduğunu deyib. Təxminən 16 faiz istifadəçi isə texnologiyanın insanların tənqidi düşünmə qabiliyyətinə mənfi təsir göstərə biləcəyini düşünür.

Araşdırma çərçivəsində 159 ölkədən “Claude” adlı çat-botun 80 mindən çox istifadəçisi ilə müsahibə aparılıb. Müsahibələr şirkətin “Claude Interviewer” adlı süni intellekt xidməti vasitəsilə həyata keçirilib.

Tədqiqata rəhbərlik edən alim Saffron Huan bildirib ki, süni intellektə münasibətdə regionlar arasında fərqlər var. Onun sözlərinə görə, Cənubi Amerika, Afrika, Cənubi və Cənub-Şərqi Asiya ölkələrində yaşayanlar Avropa, ABŞ və Şərqi Asiya ilə müqayisədə texnologiyaya daha nikbin yanaşırlar.

Alim qeyd edib ki, aşağı və orta gəlirli ölkələrdə insanlar süni intellektə daha müsbət baxır, çünki yüksək gəlirli ölkələrdə bu texnologiyanın təsiri daha çox hiss olunur.

Mütəxəssislər hesab edir ki, süni intellektin inkişafı ilə bağlı əsas narahatlıq yalnız iş yerləri deyil, həm də sistemlərin səhv qərarlar verməsi riskidir.

23-03-2026, 10:54 30