Prezident İlham Əliyev Şuşada keçirilən IV Şuşa Qlobal Media Forumunun açılış mərasimində çıxışı zamanı Sumqayıtın sovet dövründə üzləşdiyi ekoloji problemlərdən danışıb.

Sumqayit.tv xəbər verir ki, dövlət başçısı Azərbaycanın uzun illər öz təbii sərvətlərindən lazımi şəkildə faydalana bilmədiyini vurğulayıb.

Prezident bildirib ki, ölkənin sərvətləri uzun illər Azərbaycan xalqının rifahına xidmət etməyib:

"Biz ancaq özümüzə güvənə bilərik. Baxmayaraq ki, Azərbaycanın çox böyük sərvətləri olub, əvvəllər onlardan heç biri, sözün əsl mənasında, Azərbaycan xalqının inkişafında rol oynamırdı. Çünki biz daha çox ümumittifaq büdcəsinə verirdik, heç nə almırdıq. Bizdən neft aparılırdı, Sumqayıt şəhəri ekoloji fəlakətə uğramışdı. Sovet İttifaqı dağılanda isə hər şey viran qalmışdı, torpaqlarımız əldən getmişdi", – deyə Prezident qeyd edib.

İlham Əliyev çıxışında vurğulayıb ki, Azərbaycanın inkişafı və təhlükəsizliyi üçün əsas dayaq dövlət və milli birlikdir.

"Bu mənada, ancaq özümüzə və dövlətə güvənməliyik, birlik heç vaxt sarsılmamalıdır. Bu gün Azərbaycan cəmiyyətində olan birliyə oxşar mənzərə tapmaq çətindir, çünki bu, insanların zehnindən və ürəyindən gəlir", – deyə dövlət başçısı əlavə edib.

Bu gün, 15:59 7