“Baxın, hazırda İranda baş verən qətl hədisəsinin arxasında İsrail dayanır. Aydındır ki, adıçəkilən ölkə kəşfiyyatı tərəfindən HƏMAS rəhbərinə qarşı əməliyyat təşkil olunub. İstər eks prezident İbrahim Rəisi, istərsə də İsmayıl Haniyə ölkənin Ali Rəhbəri Əli Xameneiyə yaxınlığı ilə tanınırdı. İndi təsəvvür edin ki, İran onları qoruya bilmədi. Düzdür, İran siyasətindən xəbəri olmayan bəzi insanlar iddia edir ki, Rəisi və Haniyə kimi şəxslər hakimiyyət qüvvələri tərəfindən məhv edilib. Olduqca absurd yanaşmadır. İran indiki düzənini çətinliklə qurub. İstəməz ki, kimsə bu quruluşu dağıtsın. Baxın, baş verən hadisələrin bir səbəbi var: İran kadr seçərkən bacarığa yox, sadiqliyə üstünlük verir. Ona görə də bəzi sahələrdə çatışmazlıqlara rast gəlinir. İsrail və digər ölkələrin kəşfiyyatı qonşu dövlət ərazisində rahatlıqla hərəkət edə bilirlər. Hətta onların məxfi sənədləri ABŞ və başqa ölkələr tərəfindən ələ keçirilib. Qeyd etdiyim kimi, baş verən bütün məsələlərin ardında düzgün olmayan kadr seçimləri dayanır”.