Son günlər müşahidə olunan intensiv və fasiləsiz yağıntılar nəticəsində Sumqayıt şəhərinin bir sıra ərazilərində çətinliklər yaranıb.

Sumqayit.tv xəbər verir ki, mövcud vəziyyətin aradan qaldırılması məqsədilə aidiyyəti qurumlar tərəfindən tədbirlər gücləndirilmiş rejimdə davam etdirilir. Hazırda şəhərin müxtəlif hissələrində su basmış ərazilərin təmizlənməsi, yağış sularının kənarlaşdırılması, kanalizasiya xətlərinin açılması və digər zəruri işlər həyata keçirilir. Məlumata görə, bu tədbirlər xüsusi briqadalar tərəfindən fasiləsiz olaraq icra olunur.

İntensiv yağıntıların normadan artıq olması nəticəsində mərkəzləşdirilmiş kanalizasiya xətlərində, xüsusilə bəzi kollektorlarda qəzalar qeydə alınıb. Qəzaların aradan qaldırılması istiqamətində Azərbaycan Dövlət Su Ehtiyatları Agentliyi-nin yerli qurumları tərəfindən işlər davam etdirilir. Hazırda şəhərin 10-cu mikrorayon ərazisi, Koroğlu prospekti və digər problemli sahələrdə bərpa tədbirləri aparılır.

Qeyd olunur ki, şəhərdə mövcud kanalizasiya xətlərinin əksəriyyəti uzun illər əvvəl inşa olunub və istismar müddətini başa vurub. Bu səbəbdən intensiv yağıntılar zamanı bəzi ərazilərdə oxşar çətinliklərin yaranması mümkündür.

Məlumatda həmçinin bildirilir ki, problemin sistemli həlli məqsədilə İlham Əliyev tərəfindən Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026–2035-ci illəri əhatə edən Dövlət Proqramı təsdiq olunub.

Proqram çərçivəsində Bakı, Sumqayıt və Abşeron ərazilərində su və kanalizasiya infrastrukturunun yenilənməsi nəzərdə tutulur. Yaxın illərdə Sumqayıt şəhərində də içməli su və kanalizasiya şəbəkəsinin genişləndirilməsi və mövcud sistemlərin mərhələli şəkildə modernləşdirilməsi planlaşdırılır.

7-04-2026, 14:38 38