Yeni Azərbaycan Partiyası (YAP) Sumqayıt şəhər təşkilatı tərəfindən Ümummilli Lider Heydər Əliyevin anadan olmasının 103-cü ildönümünə həsr olunmuş “Azərbaycanın Xilaskarı” adlı tədbir keçirilib.

Tədbirdə əvvəlcə Ulu Öndər Heydər Əliyevin və Azərbaycanın ərazi bütövlüyü uğrunda şəhid olmuş şəxslərin xatirəsi yad olunub, Dövlət Himni səsləndirilib.

Çıxış edənlər Heydər Əliyevin dövlət quruculuğu prosesindəki rolundan, ölkənin inkişafı və sabitliyinin təmin olunması istiqamətində həyata keçirilən siyasətdən danışıblar. Tədbirdə YAP Sumqayıt şəhər təşkilatının sədri Ramiz Hüseynov, Sumqayıt Şəhər İcra Hakimiyyətinin başçısı Zakir Fərəcov, Ailə, Qadın və Uşaq Problemləri üzrə Dövlət Komitəsinin sədri Bahar Muradova və Milli Məclisin komitə sədri Hicran Hüseynova çıxış ediblər.

Şəhid ailəsi üzvləri də tədbirdə iştirak edərək dövlət tərəfindən göstərilən diqqət və qayğıdan danışıblar.