“Bakı Metropoliteni” QSC-nin sədri Vüsal Aslanov paytaxt və ətraf ərazilərdə ictimai nəqliyyatın gələcək inkişafı ilə bağlı geniş açıqlamalar verib. Sədrin səsləndirdiyi planlarda Sumqayıt istiqaməti ilə bağlı məsələlər də xüsusi diqqət çəkib.

Sumqayit.tv xəbər verir ki, Vüsal Aslanov bildirib ki, gələcəkdə Bakı şəhərinin nəqliyyat sistemi vahid şəbəkə prinsipi əsasında idarə olunacaq. Metro, avtobus, tramvay və taksi xidmətlərinin bir-birini tamamlayan formada fəaliyyət göstərməsi nəzərdə tutulur.

Onun sözlərinə görə, Bənövşəyi xəttin şəhər mərkəzinə tam inteqrasiyası gələcəkdə Xırdalan, Masazır və Sumqayıt istiqamətindən gələn sərnişin axınının daha rahat şəkildə qarşılanmasına imkan yaradacaq. Qeyd olunub ki, bu layihələr Bakı nəqliyyat sistemində sıxlığın azaldılmasına xidmət edəcək.

Sədr həmçinin bildirib ki, paytaxtda 10 yeni metro stansiyasının tikintisi planlaşdırılır. Yeni xətlər və keçidlər istifadəyə verildikdən sonra şəhərətrafı istiqamətlərdən gələn sərnişinlərin mərkəzə daha sürətli və rahat çatması hədəflənir.

Vüsal Aslanov əlavə edib ki, gələcəkdə vahid ödəniş sistemi, mobil tətbiqlər və süni intellekt əsaslı nəqliyyat idarəetməsi də tətbiq olunacaq. Bu sistemlər vasitəsilə sərnişinlər metro və digər nəqliyyat növləri arasında keçidləri daha rahat həyata keçirə biləcəklər.

13-05-2026, 11:19 380