Bakı Apellyasiya Məhkəməsində soyğunçuluqda təqsirləndirilən Əziz Bədəlovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb. 

Sumqayit.tv xəvər verir ki, Pravda.az-ın əldə etdiyi məlumata görə, hakim Murad Məmmədovun sədrliyi ilə keçirilən prosesdə qərar elan olunub.

Qərara əsasən, apellyasiya şikayəti təmin edilməyib.

İlkin istintaq materiallarına görə, Əziz Bədəlov ardıcıl olaraq iki soyğunçuluq əməli törətməkdə ittiham olunur.

Belə ki o, 4 dekabr 2024-cü il tarixdə saat 22 radələrində Sumqayıt şəhərinin 48-ci məhəlləsində yerləşən “Buta” aptekinə müştəri qismində daxil olaraq, satış yerinə qanunsuz keçib. Bu zaman, əczaçı tərəfindən kassanın açılmasından istifadə edən Əziz oradan 245 manat nağd pulu açıq şəkildə götürərək hadisə yerindən qaçıb. Hadisə nəticəsində əczaçıya mənəvi, apteki təmsil edən hüquqi şəxsə isə 245 manat məbləğində maddi ziyan dəyib.

İttiham sənədlərinə görə, təqsirləndirilən şəxs növbəti gün – 5 dekabr 2024-cü ildə saat 01:00 radələrində digər aptekə daxil olaraq təkrar soyğunçuluq əməli törədib. O, “Natural” aptekdə əczaçıya qarşı həyat və sağlamlıq üçün təhlükəli olmayan zor tətbiq edib, saçından dartmaq, əlini burmaq, ağzını bağlamaq və baş nahiyəsinə yumruqla vurmaqla fiziki zor tətbiq edib. Bu hərəkətlər nəticəsində zərərçəkmişə hər hansı ağır nəticə doğurmayan, dərəcəsi təyin edilməyən xəsarət yetirilib.

Daha sonra Əziz piştaxta üzərindəki qutudan 93 manat nağd pulu açıq şəkildə götürərək hadisə yerindən uzaqlaşıb. Baş vermiş hadisə nəticəsində əczaçı fiziki, aptekə aid olan "Bahar Pharma" MMC isə maddi ziyana məruz qalıb.
 

İstintaq orqanı bildirir ki, hər iki epizod təkrar soyğunçuluq əlamətləri ilə törədilmiş açıq talama faktları kimi qiymətləndirilir.

Hadisədən sonra Əziz Bədəlov saxlanılaraq cinayət məsuliyyətinə cəlb edilib.

Xətai Rayon Məhkəməsinin hökmü ilə o, 3 il 6 ay müddətinə azadlıqdan məhrum edilib.

9-12-2025, 16:14 39