18-19 aprel tarixlərində Azərbaycan Gənclər və İdman Nazirliyinin dəstəyi, Azərbaycan Bodibildinq və Fitnes Federasiyasının təşkilatçılığı ilə yeniyetmələr, gənclər, böyüklər və masterlər arasında qol güləşi üzrə Azərbaycan çempionatı keçirilib.
Sumqayit.tv xəbər verir ki, ölkənin müxtəlif şəhər və rayonlarından, klub və idman cəmiyyətlərindən 200-ə yaxın idmançının iştirak etdiyi yarışda Fövqəladə Hallar Nazirliyinin qol güləşi üzrə yığma komandasının üzvləri uğurlu nəticələr əldə ediblər.
Belə ki, Dövlət Yanğından Mühafizə Xidmətinin əməkdaşı, daxili xidmət çavuşu Sənan Şükürov 86 kiloqram çəki dərəcəsində sağ qol üzrə bütün rəqiblərinə qalib gələrək qızıl medal, sol qol üzrə isə gümüş medal qazanıb.
Komandanın digər üzvü, Sumqayıt Regional Mərkəzinin əməkdaşı mayor Rəşad Hacıyev isə +105 kiloqram çəki dərəcəsində master kateqoriyasında sağ qol üzrə mübarizə apararaq çempionatın gümüş medalına layiq görülüb.
Bundan başqa, aprelin 18-də Gənclər və İdman Nazirliyi və Azərbaycan Bilyard Federasiyasının birgə təşkilatçılığı ilə dövlət qurumlarının əməkdaşları arasında bilyard yarışı da keçirilib.
Yarışda FHN-in Xüsusi Riskli Xilasetmə Xidmətinin əməkdaşı gizir Rauf Əsgərov gümüş, Kiçikhəcmli Gəmilərə Nəzarət və Sularda Xilasetmə Dövlət Xidmətinin əməkdaşı leytenant Cavid Mustafazadə isə bürünc medal qazanıb.
Qaliblərə Gənclər və İdman Nazirliyi tərəfindən medal və diplomlar təqdim olunub.
20-04-2026, 18:17
309
