1 milyard 129 milyon manatlıq yeni investisiya paketində Sumqayıt Sənaye Parkı Bakı-Abşeron üzrə ayrıca kateqoriyada göstərildi.
Sumqayit.tv xəbər verir ki, Azərbaycanın regionlarında yerləşən sənaye zonalarında həyata keçirilən layihələrə əlavə 1 milyard 129 milyon manat investisiyanın qoyulması planlaşdırılır.
Bu barədə iqtisadiyyat nazirinin birinci müavini Elnur Əliyev Milli Məclisin bugünkü plenar iclasında 2026-cı ilin dövlət büdcəsi zərfinə daxil olan Vergi Məcəlləsinə və digər qanunlara təklif edilən dəyişikliklərin müzakirəsi zamanı məlumat verib.
Nazir müavini bildirib ki, Biznesin İnkişafı Fondu vasitəsilə bu ilin 10 ayında ümumilikdə 290 milyon manat kredit vəsaiti ayrılıb. Bu məbləğin 66 %-i (təxminən 193 milyon manat) Bakı və Abşeron istisna olmaqla regionlara yönəldilib. Ümumilikdə 5 800 regional layihə maliyyələşdirilib və onların dəyəri 655 milyon manat təşkil edir. Layihələrin 89 %-i mikro, kiçik və orta sahibkarlara aiddir.
Elnur Əliyev vurğulayıb ki, statistikada Bakı-Abşeron iqtisadi zonası üzrə yalnız iki sənaye ərazisi – Sumqayıt Sənaye Parkı və Balaxanı Sənaye Zonası – ayrıca kateqoriyada göstərilir. Digər regionlardakı sənaye zonalarına isə ümumilikdə 80 milyon manat investisiya qoyulub.
21-11-2025, 16:35
126
