Bir müddət öncə Stansiya Sumqayıt sakinləri Sumqayit.tv-yə məktub ünvanlayaraq öz şikayətlərini çatdırmışdılar. Qəsəbə sakinləri qeyd edirdi ki, öz övladlarını yaxınlıqda- Tuqzavod deyilən ərazidə yerləşən 42 saylı məktəbə aparırlar. Ancaq bunun üçün Bakı-Quba dairəvi yolunu keçməli olurlar. Bu ərazi isə yaşayış yerindən aralı yerləşdiyi üçün avtomobillər yüksək sürətlə hərəkət edir. Ələlxüsus ağır tonnajlı avtomobillərin bu  yoldan sürətli şəkildə keçməsi bu yoldan əks tərəfə keçənlər üçün faktiki olaraq ölüm təhlükəsi yaradır. Üstəlik, yolun ortasında dəmir maneələr var. Valideynlər məcbur qalıb öz övladlarını dəmir maneələrin üstündən keçirməklə məktəbə aparırlar. Bu isə 600 yaşayış evi olan qəsəbə sakinləri üçün əziyyət deməkdir. Hətta sakinlər bununla bağlı deputat Tahir Mirkişilinin qəbulunda olmuşdular. Sevindirici haldı ki, qısa müddətdən sonra bu problem həll olunub.
 Sakinlərin istəyinə uyğun olaraq dəmir arakəsmə açılıb. Müvafiq yol nişanları qoyulub. Redaksiyamıza müraciət edən sakinlər bu problemin həll edilməsində əziyyəti keçən deputat Tahir Mirkişiliyə, "Azəravtoyol" ASC-yə, Dövlət Yol Polisinə öz təşəkkürünü çatdırıb.