Sumqayıt Kimya Sənaye Parkında fəaliyyət göstərən “Kartaş Kimya” MMC yaxın müddətdə işçi heyətini 200 nəfərə çatdırmağı planlaşdırır.

Sumqayittv xəbər verir ki, bu barədə müəssisənin direktoru Necmeddin Taşbağ Prezident İlham Əliyevin iştirakı ilə keçirilən mediatur zamanı jurnalistlərə açıqlama verib.

Onun sözlərinə görə, zavodun ümumi investisiya dəyəri 25 milyon manat təşkil edir. 9,100 kvadratmetrlik sahədə yerləşən müəssisədə 7 istehsal xətti fəaliyyət göstərəcək. Burada quru qarışıqlar, beton əlavələri, poliüretan və poliüre əsaslı su izolyasiya məhsulları, eləcə də epoksid əsaslı döşəmə örtükləri istehsal olunacaq.

Necmeddin Taşbağ əlavə edib ki, daha əvvəl başqa istehsalat sahələrində hazırlanan bəzi məhsullar da artıq bu zavodda istehsal olunacaq.

Qeyd edək ki, “Kartaş Kimya” zavodu Prezident İlham Əliyevin 2025-ci il aprelin 30-da Sumqayıt Kimya Sənaye Parkına səfəri zamanı rəsmi olaraq fəaliyyətə başlayıb.

1-05-2025, 15:54 227