Şəhərin tullantı problemi və çirkab suların Xəzərə axıdılması nəzərə alınaraq, ekoloji tarazlığı qorumaq məqsədilə müasir zavod və sutəmizləyici sistemlərin genişləndirilməsi təklif edilir.

Sumqayit.tv xəbər verir ki, Milli Məclisin deputatı Səbinə Salmanova parlamentin bugünkü plenar iclasında "Azərbaycan Respublikasının 2026-cı il dövlət büdcəsi haqqında" qanun layihəsinin ikinci oxunuşu zamanı Sumqayıtda tullantıların utilizasiyası zavodunun inşasını təklif edib.

Deputat bildirib ki, şəhərin 500 mindən çox əhalisi ilə məişət tullantılarının həcmi ildən-ilə artır, mövcud poliqon isə bu yükü daşımaqda çətinlik çəkir. Tullantıların yandırılması nəticəsində yaranan tüstü və kəskin qoxu ətraf yaşayış məntəqələrində haqlı narazılığa səbəb olur. S.Salmanova vurğulayıb ki, belə bir zavod həm ekoloji tarazlığın qorunmasına xidmət edər, həm də şəhərin "yaşıl iqtisadiyyat" və "yaşıl şəhər" konsepsiyasına uyğun olar.

Deputat həmçinin bəzi sənaye müəssisələrinin tullantılarının Sumqayıtçaya, oradan isə Xəzər dənizinə axıdılması probleminin hələ də tam həllini tapmadığını qeyd edib. Dövlət Su Ehtiyatları Agentliyinin bu il apardığı yoxlamalar kimyəvi tullantıların su və torpaq tərkibinə mənfi təsirini təsdiqləyib, bu da həm dənizin flora və faunasına, həm də sakinlərin dənizdən istifadəsinə zərər verir. Halbuki, şəhərin Kotej qəsəbəsi istiqamətində yerləşən sutəmizləyici qurğu sutkada 200 min kubmetr suyu təmizləmək gücünə malikdir, lakin potensial tam istifadə olunmur.

S.Salmanova əlavə edib ki, hazırda 18 nöqtədən Xəzərə çirkab sular axır və mövcud qurğuya birləşdirilməsi ilə ekoloji riskin qarşısı alınmış olar. Deputat bu baxımdan təklif edir ki, Sumqayıtda sutəmizləyici sistemlərin bərpası və genişləndirilməsi üçün təcili tədbirlər həyata keçirilsin. Bu, həm dənizin ekoloji mühafizəsinə, həm də şəhər əhalisinin sağlam yaşayış mühitinin qorunmasına xidmət edəcək.

2-12-2025, 14:45 95