Ceyranbatan su anbarı Abşeron yarımadasının böyük hissəsinin – Bakı və Sumqayıt şəhərlərinin, həmçinin ətraf qəsəbələrin içməli su təchizatında əsas rol oynayır. Lakin bu suyun anbarlardan evlərə çatana qədər keçdiyi mərhələlər barədə suallar daima gündəmdə olur.

Sumqayit.tv xəbər verir ki, Ceyranbatan Su Təchizatı İdarəsinin baş mühəndisi Oruc Bayramov məsələ ilə bağlı Baku TV-yə danışıb. O, sosial şəbəkələrdə Ceyranbatan su anbarına qrunt sularının axıdılması barədə yayılan məlumatların həqiqətə uyğun olmadığını bildirib. Onun sözlərinə görə, bu kimi iddialar əsassızdır və suyun təmizlənməsi prosesi ciddi nəzarət altında aparılır.

Baş mühəndis açıqlamasında qeyd edib ki, Ceyranbatan anbarından su əvvəlcə yeraltı borular vasitəsilə mexaniki süzgəc binasına ötürülür. Burada filtr qurğuları 3 millimetr və daha böyük ölçülü canlıları və digər yad cisimləri sudan ayırır. Mexaniki təmizləmədən sonra su xam məhsul anbarına yönləndirilir.

Daha sonra su əsas süzgəc qurğusuna ötürülərək yenidən filtrasiya olunur və emal üçün qurğuların əsas hissəsinə daxil edilir. O.Bayramovun sözlərinə görə, prosesin hər mərhələsində suyun keyfiyyəti xüsusi laboratoriyada mütəmadi şəkildə yoxlanılır. Su nümunələri həm kimyəvi, həm də bakterioloji cəhətdən analiz edilir. Nəticədə sudakı bağırsaq çöpləri, bakteriyalar və virusların olub-olmaması dəqiq şəkildə təyin olunur.

Baş mühəndis vurğulayıb ki, içməli suyun keyfiyyətinə nəzarət fasiləsiz aparılır və proses tam təhlükəsiz şəkildə idarə olunur.

Daha ətraflı məlumat süjetdə təqdim edilib:

4-12-2025, 17:44 174