Sumqayıt şəhəri, 41-ci məhəllə, 4 nömrəli yataqxananın sakinləri Sumqayit.tv-in redaksiyasına müraciət edərək 31 dekabr – bayram günü bütün yataqxana üzrə qaz təchizatının heç bir əvvəlcədən xəbərdarlıq edilmədən dayandırıldığını bildiriblər.

Sakinlərin sözlərinə görə, qazın qəfil kəsilməsi nəticəsində mənzillərdə istilik və yemək bişirmə ilə bağlı ciddi problemlər yaranıb. Onlar qeyd ediblər ki, nə yazılı, nə də şifahi şəkildə əvvəlcədən hər hansı bildiriş verilməyib.

“Heç bir xəbərdarlıq etmədən bayram günü qazı kəsiblər. Evdə uşaqlar, yaşlılar var. Nə isinmək olur, nə də yemək bişirmək”, – deyə sakinlərdən biri redaksiyamıza bildirib.

Müraciət edən sakinlər qazın hansı səbəbdən dayandırıldığı və nə vaxt bərpa olunacağı barədə onlara rəsmi məlumat verilmədiyini vurğulayıblar. Bu vəziyyət bayram günü sakinlər arasında ciddi narazılıq yaradıb.

Məsələ ilə bağlı aidiyyəti qurumların mövqeyini öyrənməyə çalışırıq. Qarşı tərəfin açıqlaması olarsa, materialda yer veriləcək.

Sumqayit.tv olaraq məsələni diqqətdə saxlayırıq.

Müəllif: Sumqayit.tv

31-12-2025, 11:41 74