Bu gün Azərbaycanın Milli Qəhrəmanı, şəhid general-mayor Polad Həşimovun doğum günüdür.
Sumqayit.tv xəbər verir ki, Polad Həşimov 2 yanvar 1975-ci ildə Qəbələ rayonunun Vəndam kəndində anadan olub. Daha sonra ailəsi ilə birlikdə Sumqayıt şəhərinə köçüb. Orta təhsilini Sumqayıtda 28 və 34 nömrəli məktəblərdə alıb, Heydər Əliyev adına Ali Hərbi Məktəbi bitirib.
General-mayor Polad Həşimov 2020-ci il iyulun 14-də Tovuz istiqamətində Ermənistan silahlı qüvvələrinin hücumunun qarşısını alarkən gedən şiddətli döyüşlər zamanı qəhrəmancasına şəhid olub. Onun nəşi əvvəlcə doğulduğu Vəndama, daha sonra yaşadığı Sumqayıt şəhərinə gətirilib və iyulun 15-də II Fəxri xiyabanda dəfn olunub.
Şəhid generalın ailəsinə Prezident İlham Əliyev tərəfindən dərin hüznlə başsağlığı verilib. 2020-ci il dekabrın 9-da Polad Həşimova ölümündən sonra “Azərbaycanın Milli Qəhrəmanı” adı verilib.
Polad Həşimov hərbi xidməti dövründə bir sıra yüksək dövlət təltiflərinə layiq görülüb. O, “Hərbi xidmətlərə görə”, “Vətən uğrunda” medalları, həmçinin II və III dərəcəli “Vətənə xidmətə görə” ordenləri ilə təltif edilib. 2019-cu ildə ona general-mayor ali hərbi rütbəsi verilib.
Milli Qəhrəmanın xatirəsi Azərbaycanda və Türkiyədə əbədiləşdirilib. Qəbələ və Bakı şəhərlərində küçələr, Türkiyənin Osmanqazi rayonunda isə park onun adını daşıyır.
Polad Həşimovun Davud və Teymur adlı oğulları, Aybəniz adlı qızı yadigar qalıb.
2-01-2026, 09:20
121
