Sumqayıt şəhərinin bir sıra ərazilərində, o cümlədən Corat bağlarında yaşayan sakinlər artıq iki gündür smart kart tipli qaz sayğaclarının işləməməsindən ciddi narazılıq edirlər.

Sakinlərin Sumqayit.tv-yə verdiyi məlumata görə, üzərində “Azəriqaz” yazısı olan sarı rəngli smart kartların balansını artırmaq və vəsaiti sayğaca yükləmək mümkün deyil. Nəticədə abonentlər qazdan istifadə edə bilmir, xüsusilə qış mövsümündə bu vəziyyət ailələr üçün ciddi çətinlik yaradır.

İddialara əsasən, problem kütləvi xarakter daşıyır. Sakinlər bildirirlər ki, nə səbəb, nə də problemin nə vaxt aradan qaldırılacağı barədə onlara məlumat verilməyib. 

Qaz təchizatında yaranan bu qeyri-müəyyənlik ictimai narazılığı artırır. Sakinlər aidiyyəti qurumlardan təcili müdaxilə və rəsmi izahat tələb edirlər.
Sumqayit.tv olaraq məsələ ilə bağlı rəsmi qurumlar tərəfindən məlumat almağa çalışırıq.

2-01-2026, 13:12 131