Azərbaycanda su təchizatı sahəsində mövcud problemlərin əsas səbəblərindən biri yüksək itkilərlə bağlıdır.
Sumqayit.tv xəbər verir ki, bu barədə Prezident İlham Əliyev “Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026–2035-ci illər üzrə Dövlət Proqramı”na həsr olunmuş müşavirədə bildirib.

Dövlət başçısı vurğulayıb ki, hazırda bu sahədə itkilər 40–45 faiz civarındadır və proqramın icrası nəticəsində bu göstərici kəskin şəkildə azaldılmalıdır. Onun sözlərinə görə, itkilər aşağı səviyyədə olsaydı, mövcud su ehtiyatları bu gün üçün kifayət edərdi. Prezident qeyd edib ki, əhalinin və sənayenin artması fonunda gələcək tələbat da nəzərə alınmalıdır.

Prezident İlham Əliyev bildirib ki, proqram çərçivəsində Sumqayıt şəhəri də daxil olmaqla Bakı və Abşeron yarımadasında su təchizatı əhəmiyyətli dərəcədə yaxşılaşdırılacaq. Dövlət Proqramının icrası nəticəsində 30-a yaxın yeni su anbarının tikintisi, 200 kilometrdən çox magistral kanalın və paylayıcı şəbəkələrin inşası və yenidən qurulması nəzərdə tutulur.

Dövlət başçısı həmçinin qeyd edib ki, hazırda fasiləsiz içməli su ilə təmin olunan əhalinin payı 70 faiz təşkil edir. Proqramın icrasından sonra bu göstəricinin 95 faizə çatdırılması planlaşdırılır. Bununla yanaşı, Sumqayıt şəhəri, Abşeron rayonu və 64 yaşayış məntəqəsində su təchizatının keyfiyyəti ciddi şəkildə yaxşılaşdırılacaq, sayğaclaşdırma isə 100 faiz səviyyəsinə çatdırılacaq.

Prezident əlavə edib ki, Dövlət Proqramı ölkənin sosial-iqtisadi inkişafı, əhalinin həyat şəraitinin yaxşılaşdırılması və strateji infrastrukturun gücləndirilməsi baxımından mühüm əhəmiyyət daşıyır.

Dünən, 16:42 6