Abşeron rayon sakini bələdiyyə tərəfindən yazılan borcla bağlı redaksiyamıza müraciət edib. Sakin bildirir ki, yaşadıqları bina evinə görə onlara borc göndərilib, lakin ərazi üzrə bələdiyyə tərəfindən hər hansı xidmət göstərilməyib.
Müraciətdə qeyd olunur ki, yaranan problemlər olduqda sakinlər öz hesablarına təmir və bərpa işləri aparırlar. Bu səbəbdən vətəndaşlar bələdiyyəyə ödəniş etməli olub-olmadıqları və yazılan borcun hansı əsasla hesablandığı ilə maraqlanırlar.
Məsələyə hüquqi aydınlıq gətirmək üçün vəkil Ramil Süleymanovun mövqeyini öyrəndik.
Hüquqşünas Sumqayit.tv-yə açıqlamasında bildirib ki, vətəndaşlar yaşadıqları ərazi üzrə bələdiyyələr tərəfindən müəyyən olunmuş vergiləri ödəməlidirlər və bu ödənişlər əsasən əmlak vergisi ilə bağlı olur.
Onun sözlərinə görə, bu vergi daşınmaz əmlakın yerləşdiyi torpaq sahəsinə görə hesablanır və bələdiyyələrin vergi toplamaq hüququ qanunvericilikdə nəzərdə tutulub.
“Vətəndaşların belə hallarda borcu mübahisələndirmək hüququ var. Bələdiyyə ilk növbədə göstərdiyi xidmətlərlə bağlı hesabat təqdim etməlidir. Bundan başqa, həmin torpaq sahəsinin nə vaxt və hansı əsasla bələdiyyənin balansına keçdiyi sənədlərlə sübut olunmalıdır. Çünki bir çox binalar bələdiyyələr yaranmamışdan əvvəl, sovet dövründə dövlət balansında olub”, – deyə Ramil Süleymanov bildirib.
Vəkilin sözlərinə görə, bələdiyyə vergi tələb etdiyi halda, bunun müqabilində hansı xidmətlərin göstərildiyini də vətəndaşa izah etməlidir.
Hüquqşünas həmçinin qeyd edib ki, təqaüdçülərin bələdiyyə vergisindən azad olunması qanunvericilikdə təsbit olunub.
“Yaranan borcun qanuni olub-olmamasını müəyyən etmək üçün vətəndaş bələdiyyəyə rəsmi müraciət etməli və izahlı hesabat tələb etməlidir. Əgər təqdim olunan hesabata etiraz varsa, məbləği mübahisələndirmək mümkündür. Borc qanuni hesab edilərsə, ödəniş edilməlidir”, – deyə o əlavə edib.
Sumqayit.tv olaraq məsələ ilə bağlı aidiyyəti bələdiyyə qurumlarının da mövqeyini dərc etməyə hazırıq.
16-03-2026, 18:28
177
