Bu gün Azərbaycanın Ümummilli Lideri Heydər Əliyevin anadan olmasının 103-cü ildönümüdür.

Sumqayit.tv xəbər verir ki, Heydər Əliyev 1923-cü il mayın 10-da Naxçıvanda anadan olub. O, uzun illər dövlət təhlükəsizlik orqanlarında çalışıb, 1969-cu ildə isə Azərbaycan Kommunist Partiyası Mərkəzi Komitəsinin birinci katibi seçilərək respublikaya rəhbərlik edib.

1982-ci ildə SSRİ rəhbərliyində yüksək vəzifəyə yüksələn Heydər Əliyev, 1987-ci ildə Mixail Qorbaçovun siyasi kursuna etiraz olaraq istefa verib. 1990-cı ilin 20 Yanvar faciəsindən sonra Moskvada çıxış edərək Azərbaycan xalqına qarşı törədilən qırğını kəskin pisləyib.

1993-cü ildə ölkədə yaranmış ağır siyasi böhran dövründə xalqın tələbi ilə hakimiyyətə qayıdan Heydər Əliyev əvvəlcə Ali Sovetin sədri, daha sonra isə Azərbaycan Respublikasının Prezidenti seçilib. 1998-ci ildə yenidən prezident seçilən Ulu Öndər 2003-cü ildə səhhətində yaranan problemlərlə əlaqədar seçkilərdə iştirak etməyib.

Heydər Əliyev 2003-cü il dekabrın 12-də ABŞ-da vəfat edib və Bakıda Fəxri Xiyabanda dəfn olunub.

Qeyd edək ki, Prezident İlham Əliyevin sərəncamı ilə 2023-cü il Azərbaycanda “Heydər Əliyev İli” elan olunmuşdu. Ulu Öndərin ən böyük arzularından biri olan Qarabağın azadlığı isə Prezident İlham Əliyevin rəhbərliyi ilə reallığa çevrilib. Hazırda işğaldan azad edilmiş ərazilərdə genişmiqyaslı bərpa-quruculuq işləri davam etdirilir.

10-05-2026, 10:53 261