Sumqayıt şəhərinin Zeynalabdin Tağıyev qəsəbəsinin Quşçuluq adlanan yaşayış massivində sakinlər uzun illərdir kanalizasiya probleminin həll olunmadığını bildirirlər.

Sumqayit.tv-yə daxil olan müraciətdə qeyd olunur ki, Bakı–Quba magistral yolunun kənarında, Arzu marketin yaxınlığında yerləşən ərazidə kanalizasiya xətti olmadığı üçün yağışlı hava zamanı küçə və yollar bərbad vəziyyətə düşür.

Sakinlərin sözlərinə görə, yağıntıdan sonra ərazi su ilə dolur və hərəkət etmək demək olar ki, mümkünsüz olur.

Şikayətçilər bildirirlər ki, məsələ ilə bağlı dəfələrlə aidiyyəti qurumlara müraciət edilsə də, problem hələ də həllini tapmayıb.

“4 ildir söz verirlər ki, kanalizasiya çəkiləcək. Gəlib baxırlar, amma heç bir tədbir görülmür. Yağış yağanda küçələr keçilməz vəziyyətə düşür”, – deyə sakinlər qeyd ediblər.

Vətəndaşlar aidiyyəti qurumlardan problemin aradan qaldırılması və ərazidə kanalizasiya infrastrukturunun qurulması ilə bağlı tədbir görülməsini xahiş edirlər.

Qarşı tərəfin mövqeyini dərc etməyə hazırıq.

Bu gün, 11:57 47