Sumqayıt artıq çoxdan Azərbaycanın ikinci ən böyük şəhərinə çevrilib. Rəsmi statistikaya görə şəhərdə 470 minə yaxın insan yaşayır. Qeyri-rəsmi məlumatlarda isə bu rəqəmin 700 minə yaxın olduğu bildirilir. Yeni yaşayış massivləri salınır, avtomobillərin sayı ildən-ilə artır, yollar yenilənir. Ancaq bütün bunların fonunda bir sual cavabsız qalır: Bu şəhərdə piyadaların təhlükəsizliyi niyə hələ də prioritet deyil?

Maraqlıdır ki, yüz minlərlə insanın yaşadığı Sumqayıtda bu günədək nə yeraltı, nə də yerüstü piyada keçidi inşa olunub. Halbuki şəhərin bir neçə nöqtəsində belə keçidlərə böyük ehtiyac var.

Sülh küçəsindən Bulvara, xüsusilə Göyərçin abidəsi istiqamətinə keçmək istəyən yüzlərlə insan hər gün intensiv nəqliyyat axınının arasından yolunu tapmağa çalışır. Eyni mənzərə Karvan Ticarət Mərkəzinin arxa hissəsində, Sülh küçəsinə çıxışda da yaşanır.

Daha təhlükəli ərazilərdən biri isə 9-cu mikrorayonla 5-ci mikrorayonu birləşdirən hissədir. Heydər Əliyev Parkı tərəfindən gələn piyadalar çox vaxt qarşı tərəfə keçmək üçün Azpetrol yanacaqdoldurma məntəqəsinin ərazisindən istifadə etməyə məcbur olurlar. Yanacaqdoldurma məntəqəsi insanların keçidi üçün nəzərdə tutulmayıb və bu vəziyyət həm piyadalar, həm də sürücülər üçün ciddi risk yaradır.

Problemin digər tərəfi yol hərəkətinin təşkilidir. Bəzi ərazilərdə yaşıl işıq eyni vaxtda həm avtomobillər, həm də piyadalar üçün yanır. Nəticədə sürücülər piyadalara yol vermək məcburiyyətində qalır, nəqliyyatın hərəkəti ləngiyir, tıxaclar yaranır. Vaxt itirilir, əsəblər gərilir və ən əsası, qəza riski artır.

Müasir şəhərlərdə yeraltı və yerüstü piyada keçidləri sadəcə infrastruktur elementi deyil. Onlar insan həyatının qorunmasına, nəqliyyatın daha səmərəli hərəkətinə və şəhərin müasir simasının formalaşmasına xidmət edir.

Sumqayıtın inkişafı yalnız yeni binalar və geniş yollarla ölçülməməlidir. İnkişaf o zaman hiss olunur ki, insanlar özlərini küçədə təhlükəsiz hiss etsinlər.

Artıq şəhərin ən problemli nöqtələrində yeraltı və ya yerüstü piyada keçidlərinin tikintisi ilə bağlı konkret addımların atılmasına ehtiyac var. Çünki söhbət təkcə rahatlıqdan yox, insan həyatından gedir.

Müəllif: Rövşən Hacıyev, xüsusi olaraq Sumqayit.tv üçün 

4-08-2026, 20:32 52