Sumqayıt və Abşeron bölgəsində tibb xidmətlərinin təşkilində yeniliklər tətbiq edilir.

Sumqayit.tv xəbər verir ki, Bakı və ətraf rayonlarla yanaşı, Sumqayıt və Abşeron bölgəsində yerləşən bir sıra tibb müəssisələrinə elektron monitorlar və növbə terminalları quraşdırılıb. Bu barədə məlumatı TƏBİB-in İctimaiyyətlə əlaqələr və kommunikasiya departamentinin rəhbəri Zamirə Ədilova “Sağlam dialoq: media və səhiyyə kommunikasiyasında yeni paradiqmalar” mövzusunda keçirilən təlimdə açıqlayıb.

Onun sözlərinə görə, artıq 50-dən çox tibb müəssisəsində elektron növbə sistemləri tətbiq olunub. Yenilənmiş sistemlər tibbi xidmətə müraciət edən vətəndaşların növbə prosesinin daha səmərəli şəkildə idarə olunmasına, gözləmə müddətinin azalmasına və axının tənzimlənməsinə imkan verəcək.

Ədilova qeyd edib ki, ən çox müraciət olan tibb müəssisələrindən biri Abşeron Rayon Mərkəzi Xəstəxanasıdır. Xəstəxana həm rayon sakinlərinə, həm də Sumqayıt və digər ətraf ərazilərdən gələn vətəndaşlara xidmət göstərdiyi üçün burada sıxlıq daha çox müşahidə olunur. Artıq həmin müəssisədə elektron növbə terminalları quraşdırılıb və növbələrin tənzimlənməsi sistemi işə salınıb.

8-12-2025, 11:51 48