TƏBİB-in tibb müəssisələrində həyata keçirilən struktur yenilikləri çərçivəsində bu il bir sıra yeni şöbə və xidmətlər istifadəyə verilib.
Sumqayit.tv xəbər verir ki, yeniliklər sırasında Sumqayıtla bağlı xüsusi diqqət çəkən məqamlar da var.

TƏBİB-in İctimaiyyətlə əlaqələr və kommunikasiya departamentinin rəhbəri Zamirə Ədilova Xəzər Tibb Mərkəzində keçirilən mediatur zamanı bildirib ki, ölkənin müxtəlif bölgələrində, o cümlədən Sumqayıtda tibbi xidmətlərin əlçatanlığını artırmaq məqsədilə yeni tibbi əməliyyatların icrasına başlanılıb.

Qeyd olunub ki, Sumqayıt Tibb Mərkəzində endoprotez əməliyyatlarının icrası aktiv şəkildə həyata keçirilir. Bu addım şəhər sakinlərinin daha əvvəl Bakıya üz tutduğu bir çox ortopedik əməliyyatların artıq yerli xəstəxanada aparılmasına imkan yaradır. Yeni xidmət xəstələrin növbə yükünün azalmasına və müalicəyə daha operativ çıxışa şərait yaradıb.

Bununla yanaşı, respublikanın digər tibb müəssisələrində də yeni şöbələr fəaliyyətə başlayıb. Uşaq Klinik Xəstəxanasında “Yenidoğulmuşların patologiyası” və “Yenidoğulmuşların reanimasiyası”, Sabunçu Tibb Mərkəzində “Üz-çənə cərrahiyyəsi” şöbələri açılıb. Bir sıra rayon xəstəxanalarında isə avastin inyeksiyası, uroloji əməliyyatlar, damar cərrahiyyəsi və oftalmoloji əməliyyatların icrasına start verilib.

Zamirə Ədilovanın sözlərinə görə, Qəbələ Rayon Mərkəzi Xəstəxanasında Travmatoloji Mərkəz yaradılıb, Şirvan, Cəlilabad, Astara, Sabirabad və digər bölgələr üzrə tibbi xidmətlərin spektri genişləndirilib.

Məlumatda bildirilib ki, aparılan yeniliklər xəstələrin müalicəyə əlçatanlığını artırmağı, tibbi xidmətlərin regionlar üzrə balanslı şəkildə inkişaf etdirilməsini hədəfləyir.

11-12-2025, 14:46 21