Sumqayıt şəhərində hemodializ xidmətlərinin genişləndirilməsi istiqamətində mühüm addımlar atılıb.
Sumqayit.tv xəbər verir ki, TƏBİB-in İcraçı direktoru Vüqar Qurbanovun verdiyi məlumata görə, Sumqayıt Tibb Mərkəzində dializ şöbələrinin sayı ikiyə çatdırılıb.
Bu barədə o, TƏBİB-in 2025-ci ilin yekunları və gələcək planlarına dair keçirilən brifinqdə çıxışı zamanı danışıb. Bildirilib ki, xroniki böyrək çatışmazlığı üzrə tədbirlər çərçivəsində ölkə üzrə 4 min 337 nəfər xəstə qeydiyyata alınıb.
İcraçı direktorun sözlərinə görə, hazırda respublika üzrə hemodializ xidmətinin göstərildiyi tibb müəssisələrinin sayı 43, hemodializ şöbələrinin sayı 46, hemodializ aparatlarının sayı isə 675-dir. Cari il ərzində icra olunmuş hemodializ seanslarının ümumi sayı 503 min 892 təşkil edib.
Vüqar Qurbanov qeyd edib ki, Sumqayıt Tibb Mərkəzində dializ şöbələrinin sayının artırılması şəhər və ətraf ərazilərdə yaşayan xroniki böyrək çatışmazlığı olan xəstələrin müalicəyə əlçatanlığını daha da yaxşılaşdıracaq. O, gələn il ölkənin bir sıra digər bölgələrində də yeni hemodializ şöbələrinin fəaliyyətə başlamasının nəzərdə tutulduğunu bildirib.
Qeyd edək ki, il ərzində ölkə üzrə ümumilikdə 1 772 nəfər hemofiliyalı xəstə də qeydiyyata alınıb.
19-12-2025, 13:09
57
