Azərbaycanda narkotik asılılığı ilə mübarizə çərçivəsində aparılan müalicə tədbirləri Sumqayıt şəhərini də əhatə edir.

Sumqayit.tv-in xəbərinə görə, bu məlumat **Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası**nın daimi fəaliyyət göstərən İşçi Qrupunun 2025-ci ilin yanvar–noyabr aylarını əhatə edən hesabatında yer alıb.

Hesabatda bildirilib ki, ölkə üzrə metadonla əvəzedici müalicə proqramı üç mərkəzdə həyata keçirilir. Bu mərkəzlərdən biri olan Sumqayıt Narkoloji Mərkəzində 124 xəstə müalicə alır. Ümumilikdə isə proqram çərçivəsində respublika üzrə 721 nəfər müalicəyə cəlb olunub.

Məlumata görə, Daxili İşlər Nazirliyi tərəfindən müxtəlif növ sərxoşluq hallarının müəyyən edilməsi məqsədilə on minlərlə şəxs **Respublika Narkoloji Mərkəzi**nə tibbi müayinəyə yönləndirilib. Müayinələr nəticəsində minlərlə şəxsin narkotik istifadəçisi olduğu aşkarlanıb və bununla bağlı müvafiq tədbirlər görülüb.

Rəsmi qurumların açıqlamasına görə, narkotik asılılığı ilə yanaşı yoluxucu xəstəliklərin yayılmasının qarşısının alınması istiqamətində də müsbət dinamika müşahidə olunur. Xüsusilə inyeksion narkotik istifadəçiləri arasında İİV-ə yeni yoluxma hallarının azaldığı qeyd edilib.

19-12-2025, 14:14 29