Dekabrın 2-də Sputnik Azərbaycan-da Azərbaycanın 44 günlük Vətən Müharibəsində Qələbəsinə həsr olunmuş “Qafqazda təhlükəsizlik və çağırışlar” adlı Gənc Alimlərin Respublika Forumu ilə əlaqədar mətbuat konfransı keçirilib.

Sumqayit.tv xəbər verir ki, Forumun özü dekabrın 19-da baş tutacaq və Azərbaycan Milli Elmlər Akademiyasının (AMEA) Qafqazşünaslıq İnstitutu ilə birgə STEM Analitik Mərkəzinin təşkilatçılığı ilə keçiriləcək.

Mətbuat konfransında STEM Mərkəzinin rəhbəri Orxan Yolçuyev və politoloq İlqar Vəlizadə çıxış edib.

STEM Mərkəzinin rəhbəri Orxan Yolçuyev bildirib ki, forumun əsas məqsədi beynəlxalq münasibətlər, diplomatiya, politologiya, beynəlxalq hüquq və tarix sahələrində potensial alimləri üzə çıxarmaqdır.

O əlavə edib ki, forumda iştirak gənc mütəxəssislərə öz potensialları göstərrmək üçün gözəl imkandır.

“Müharibədən sonra regionda vəziyyət dəyişdi. Azərbaycan təkcə regionda deyil, dünyada öz rolunu gücləndirib. Bunun üçün də gənc mütəxəssislərə ehtiyacımız var”.

Politoloq İlqar Vəlizadə bildirib ki, forum gənc alimlər üçün öz tədqiqat potensialını göstərmək, nitq bacarıqlarını inkişaf etdirmək və Azərbaycanı gələcəkdə dünya miqyasında təmsil etmək üçün unikal imkandır.

O, jurnalistlərin suallarını cavablandırarkən qeyd edib ki, hələ də regionda sabitliyi pozmağa çalışan oyunçular var. “Bu, çox təhlükəli oyundur. Tarixən üçüncü ölkələr regionda öz maraqlarını təmin etməyə çalışıblar”, - deyə o əlavə edib.

Ekspert əlavə edib ki, “3+3” formatının əsas məqsədi odur ki, region ölkələr üçüncü dövlətlərin müdaxiləsi olmadan bütün problemlərini özləri həll etsinlər. “Ən başlıcası regionda sabit siyasi, iqtisadi və elmi mərkəzlərin yaradılmasıdır ki, bu da bütün regionun gələcək inkişafına töhfə verəcək”, - İ.Vəlizadə qeyd edib.