Onun sözlərinə görə, tarixin müxtəlif dönəmlərində bu iki dövlət arasında qırılma nöqtələri oldu: “Bakı ilə Paris arasında fikir ayrılıqları meydana gəldi. Zaman-zaman iki dövlət arasında gərginliklər yaşanıb və bu gün də yaşanmaqda davam edir. Düşünürəm ki, Fransanın xarici işlər nazirinin Azərbaycana səfəri bu iki ölkə arasında əsən soyuq küləkləri aradan qaldırmağa xidmət edir. Bildiyiniz kimi, Fransa Avropa Birliyinin aparıcı dövlətlərindən və BMT TŞ-nın beş daimi üzvündən biridir. Bununla yanaşı, Fransa hər zaman özünü dünyaya demokratiyanın carçısı kimi təqdim edib. Bunlara baxmayaraq Fransa həmişə Azərbaycana qarşı ögey münasibət bəsləyib. Ona görə hesab edirəm ki, bu iki dövlət arasında yaranmış bütün gərginliklərin səbəbkarı Parisdir”.
Politoloq sözlərinə davam edərək bildirib ki, Bakı isə öz növbəsində hər zaman Paris ilə münasibətlərini xoş müstəvidə inkişaf etdirməyə çalışıb: “Bundan başqa mən Fransa XİN-in Azərbaycana səfərini həm də onunla əlaqələndirirəm ki, o Bakıdan həm Ermənistan hakimiyyətinə, həm Qərb və Fransada olan erməni lobbisinə xoş müjdə vermək istəyirdi. Bildiyiniz kimi, aprel ayının 23-də Azərbaycan özünün suveren hüquqlarından istifadə edərək öz ərazisi sayılan Laçın şəhərində nəzarət-keçid məntəqəsi yaratdı. Bu, istər-istəməz həm Ermənistanı, həm də onun havadarlarını, xüsusilə də Fransanı narahat etdi. Fikrimcə, xanım nazir Azərbaycana təzyiq edərək o məntəqənin aradan qaldırılmasına nail olmaq istəyirdi. Beləliklə də Ermənistana xoş müjdə vermiş olacaqdı. Amma həm ölkə başçısı cənab İlham Əliyev, həm də Azərbaycan xarici işlər naziri Ceyhun Bayramov ilə görüşdən sonra Fransa rəsmisi Bakıdan əliboş qayıtdı. Azərbaycan öz qətiyyətli mövqeyini bir daha ortaya qoydu.

Fransa onsuzda son 30 ildə imicini kifayət qədər zədələyib. Əgər Fransa rəsmi Bakıya qarşı xoş münasibət göstərmək, əlaqələrini inkişaf etdirmək istəyirsə, zədələnmiş imicini özü bərpa etməlidir. Fransız nazir burada mətbuat konfransında çıxışı zamanı qeyd edir ki, biz son 30 ildə Azərbaycanın başının nə bəlalar çəkdiyini bilirik. Əgər sizin Azərbaycanın çəkdiyi dərdlərdən xəbəriniz varsa, o zaman niyə beynəlxalq platformalarda Ermənistanı bir dəfə belə qınamadınız?! Ölkə başçımızın dediyi kimi, bugünkü gündə Azərbaycan BMT-nin icra etmədiyi qətnamələri özü icra edib torpaqlarını işğaldan azad etdikdən sonra bütün dövlətlər üstümüzə düşməyə başlayıb. Fransa bu ayrı-seçkiliyi aradan qaldırmalıdır. Əks təqdirdə Azərbaycan və Fransa arasında münasibətlərin inkişaf edəcəyini düşünmürəm”.
Müəllif: Ləman Əlizadə