Sumqayıtın H. Z. Tağıyev qəsəbəsi ilə Bakı avtoğzalı arasında işləyən 502 nömrəli avtobus xəttinin sərnişinləri sözügedən avtobusun sürücülərin qanunsuz əməlləri ilə bağlı redaksiyamıza müraciət edib. Müraciətdə qeyd edilir ki, 502 nömrəli avtobus xəttinin yolu 34 km təşkil edir. Son tariflərə görə, 40 km yola kimi 80 qəpik deyil, 70 qəpik olmalıdır. Lakin, sürücülər 1 manat alaraq, pulun qalığını sərnişinlərə geri qaytarmır: "502 nömrəli avtobusun gediş haqqısı 80 qəpik idi. Qəsəbə sakinləri olaraq AYNA-ya müraciət etdik. Gediş haqqı 40 km-ə qədər ərazilərdə 70 qəpik təşkil etdiyi üçün 502 nömrəli avtobusun da tarifi 80 qəpikdən 70 qəpiyə endirilib. Lakin, sürücülər yenə də qanunsuz olaraq sərnişinlərdən 80 qəpik tələb edirlər”. 
Bununla bağlı sakinlər AYNA-ya rəsmi qaydada müraciət edib. AYNA-da sakinlərə cavab olaraq bildirilib ki, avtobus xəttinin uzunluğu 34,6 km olduğu nəzərə alınmaqla gediş haqqı 70 qəpik müəyyən edilib. Buna baxmayaraq, sözügedən avtobus xəttinin sürücüləri rəsmi qurumun da sözlərinə məhəl qoymur. Hazırda da sərnişinlərdən qanunsuz olaraq 1 manat gediş haqqı alınır.

Məsələ ilə bağlı Azərbaycan Yerüstü Nəqliyyat Agentliyi (AYNA) ilə əlaqə saxladıq. Qurumun mətbuat katibi Tural Orucov Xeberle.com-a açıqlamasında bildirib ki, 502 nömrəli marşrut xətti üzrə gediş haqqı 70 qəpik təşkil edir: "Ölkədaxili müntəzəm şəhərlərarsı və qəsəbələrarası avtobus marşrutlarında sərnişindaşıma xidmətlərinin tariflərinin yuxarı həddinin təsdiq edilməsi haqqında 30 iyun 2024-cü il tarixli qərara əsasən, H.Z.Tağıyev qəsəbəsi – Bakı Beynəlxalq Avtovağzal Kompleksi istiqaməti üzrə hərəkət edən 502 nömrəli marşrut xətti üzrə gediş haqqı 70 qəpik təşkil edir. Daşıyıcıya sürücülərin qiymət intizamına ciddi riayət etmələri barədə tapşırıq verilib".
Elşən Yəhyayev