Sumqayıtda Milli Məclisin deputatı Mehriban Vəliyevanın təşəbbüsü ilə vətəndaşlar üçün ödənişsiz hüquqi yardım aksiyası təşkil olunub.

Sumqayit.tv xəbər verir ki, aksiya Azərbaycan Respublikasının Milli Məclisinin sədri Sahibə Qafarovanın təşəbbüsü əsasında Milli Məclis ilə Azərbaycan Respublikası Vəkillər Kollegiyası arasında qurulmuş əməkdaşlıq çərçivəsində həyata keçirilib. Tədbir Sumqayıt Regional Vəkillər Bürosunun dəstəyi ilə Yeni Azərbaycan Partiyasının Sumqayıt şəhər təşkilatının qərargahında baş tutub.

Aksiya çərçivəsində deputat Mehriban Vəliyeva və Sumqayıt Regional Vəkillər Bürosunun direktoru Anar Qasımlı hüquqi yardım almaq üçün müraciət edən vətəndaşlarla görüşərək tədbirin məqsəd və mahiyyəti barədə ətraflı məlumat veriblər.

Deputat Mehriban Vəliyeva çıxışında bildirib ki, Prezident İlham Əliyevin tövsiyələrinə uyğun olaraq bölgələrdə şəhid ailələrinə, qazilərə və aztəminatlı ailələrə hüquqi dəstəyin göstərilməsi dövlət–vətəndaş münasibətlərinin möhkəmləndirilməsi baxımından xüsusi əhəmiyyət daşıyır və bu istiqamətdə görülən işlər davamlı xarakter alıb.

Daha sonra Sumqayıt Regional Vəkillər Bürosunun vəkilləri Səadət Vəliyeva, Gülnur Qasımlı, Tural Məmmədov və Rüstəm Xələfli tərəfindən vətəndaşlar qəbul edilərək onlara ödənişsiz hüquqi yardım göstərilib. Aksiya zamanı vətəndaşlara hüquqi məsələlərlə bağlı şifahi məsləhətlər verilib, müxtəlif dövlət və digər qurumlara ünvanlanmış yazılı müraciətlər və iddia ərizələri hazırlanıb.

Qeyd edək ki, aksiya çərçivəsində 20-dən artıq vətəndaş pulsuz hüquqi yardımdan yararlanıb.

29-01-2026, 09:42 105