Azərbaycanda 2025-ci il üzrə restoran, kafe və digər ictimai iaşə obyektlərinin dövriyyəsi ilə bağlı statistika açıqlanıb.

Dövlət Statistika Komitəsi-nin məlumatına görə, Sumqayıt şəhəri ictimai iaşə dövriyyəsinə görə ölkə üzrə ikinci yerdə qərarlaşıb. Bu sahədə yalnız paytaxt Bakı Sumqayıtı qabaqlayıb.

Rəsmi statistikaya əsasən, Sumqayıt şəhərində restoran, kafe və digər ictimai iaşə obyektlərinin ümumi dövriyyəsi 62 milyon 765 min manat təşkil edib.

Hesabata görə, 2025-ci il ərzində Azərbaycan üzrə ictimai iaşə sahəsində ümumi dövriyyə 28 milyard 85 milyon 512 min manat olub.

Mütəxəssislər qeyd edirlər ki, son illər Sumqayıtda restoran və kafe sektorunun genişlənməsi dövriyyənin artmasına səbəb olub. Şəhərdə yeni iaşə obyektlərinin açılması və əhalinin sayının artması bu sahəyə marağı artıran əsas amillərdən hesab olunur.