Bu gün Azərbaycanda II və III ixtisas qrupları üzrə ali təhsil müəssisələrinə qəbul imtahanı keçirilib.

Sumqayit.tv istinadən xəbər verir ki, Dövlət İmtahan Mərkəzinin (DİM) təşkil etdiyi imtahanlar Bakı ilə yanaşı Sumqayıt da daxil olmaqla ölkənin bir sıra şəhər və rayonlarında baş tutub.

Bildirilib ki, imtahanların keçirilməsi üçün ümumilikdə 231 bina və 4206 imtahan zalı ayrılıb. Prosesin idarə olunmasına minlərlə nəzarətçi və əməkdaş cəlb olunub.

İlkin məlumatlara əsasən, imtahan zamanı 7 nəfərdə mobil telefon, 2 nəfərdə isə “ağıllı” saat aşkarlanıb. Qayda pozuntusuna yol verdikləri üçün həmin şəxslər imtahandan xaric ediliblər.

Qeyd olunub ki, imtahanda ümumilikdə 56 847 abituriyentin iştirakı nəzərdə tutulurdu.

DİM həmçinin bildirib ki, sağlamlıq imkanları məhdud olan abituriyentlərin rahat imtahan verməsi üçün xüsusi şərait yaradılıb.

Məlumata görə, imtahan nəticələrinin təxminən 3 həftədən sonra elan olunması planlaşdırılır.