2026-2027-ci tədris ili üzrə ümumi təhsil müəssisələrinin birinci siniflərinə şagird qəbulu davam edir.

Sumqayit.tv xəbər verir ki, Məktəbəqədər və Ümumi Təhsil üzrə Dövlət Agentliyinin (MÜTDA) yaydığı məlumata əsasən, hazırda ümumtəhsil məktəblərinin birinci siniflərində 131 min 407 şagird təhsil alır.

Məlumata görə, birinci sinfə qəbul prosesi mayın 6-dan etibarən start götürüb və www.mektebeqebul.edu.az portalı üzərindən həyata keçirilir.

Valideynlər məktəb və müəllim seçimini də elektron qaydada edə bilirlər. Seçim mərhələsinin iyunun 5-i saat 11:00-dək davam edəcəyi bildirilib.

Qeyd olunub ki, prioritet bölgələr sırasında Bakı, Sumqayıt, Abşeron, Gəncə və Naxçıvan şəhərləri yer alır.

Müsabiqə əsasında qəbul aparılan məktəblər üzrə qeydiyyat isə iyunun 5-i saat 18:00-dək davam edəcək. Bu məktəblər sırasına Bakı Avropa Liseyi, Respublika İncəsənət Gimnaziyası və Bülbül adına orta ixtisas musiqi məktəbi daxildir.

Bildirilib ki, birinci sinfə elektron qəbul sistemi ölkənin bütün şəhər və rayonlarını əhatə edir.

Həmçinin qeyd olunub ki, qeydiyyat zamanı uşağın şəxsiyyət vəsiqəsinin olması vacibdir.

MÜTDA-dan bildirilib ki, əsas məqsədlərdən biri valideynlər üçün məktəbə qəbul prosesində əlçatanlığın təmin edilməsidir.

Bu gün, 18:09 8