Dövlət İmtahan Mərkəzi (DİM) tərəfindən 14 iyun 2026-cı il tarixində ali təhsil müəssisələrinin magistratura səviyyəsinə qəbul imtahanı keçiriləcək.

Sumqayit.tv xəbər verir ki,İmtahan respublikanın 3 şəhər və rayonunda – Bakı, Sumqayıt və Abşeron rayonu ərazilərində, ümumilikdə 63 binada təşkil olunacaq.

İmtahan bütün mərkəzlərdə eyni vaxtda saat 10:00-da başlanacaq. Buraxılış rejimi isə saat 09:45-də başa çatacaq və bundan sonra gələn iştirakçılar imtahan binasına buraxılmayacaq.

DİM-in məlumatına görə, imtahan dinləyib-anlama bacarıqlarının yoxlanılması ilə başlayacaq. Bu mərhələyə görə iştirakçıların imtahana ən azı 15 dəqiqə əvvəl zallarda olması tələb olunur.

İmtahanın ümumi müddəti 3 saat 30 dəqiqədir. Test hissəsi 3 saatdan sonra yekunlaşacaq, daha sonra isə esse mərhələsi üçün 30 dəqiqə vaxt veriləcək.

Nəticələr iki mərhələdə açıqlanacaq: əvvəlcə qapalı və açıq tipli test tapşırıqları, daha sonra isə esse nəticələri elan ediləcək.

İmtahana ümumilikdə 15 719 bakalavr qeydiyyatdan keçib. Onlardan 14 612 nəfəri Azərbaycan bölməsi, 1 107 nəfəri isə rus bölməsi üzrə imtahan verəcək. İştirakçılar arasında 35 xarici ölkə vətəndaşı da var.

İmtahan prosesinin idarə olunmasına 1 442 nəzarətçi, 175 imtahan rəhbəri və 202 buraxılış rejimi əməkdaşı cəlb olunacaq. Həmçinin 19 sağlamlıq imkanları məhdud bakalavr üçün xüsusi şərait yaradılıb, o cümlədən fərdi nəzarətçilər təyin edilib və xüsusi zallar ayrılıb.

DİM bildirir ki, imtahan iştirakçıları “Şəxsi kabinet” və ya my.gov.az portalı vasitəsilə buraxılış vərəqələrini çap etməlidirlər. İmtahana yalnız şəxsiyyəti təsdiq edən sənəd və buraxılış vərəqəsi ilə daxil olmaq mümkündür.

Qurumdan həmçinin qeyd olunub ki, imtahan binalarına mobil telefon, elektron cihazlar, kitab və digər yardımçı materialların gətirilməsi qadağandır.

Hazırda imtahanın təşkilati və təhlükəsizlik hazırlıqları davam etdirilir. İyunun 13-də bütün imtahan mərkəzləri möhürlənərək Daxili İşlər Nazirliyi Baş Mühafizə İdarəsinin nəzarətinə veriləcək.

Bu gün, 11:55 6