Naxçıvan Muxtar Respublikasında fəaliyyət göstərən "Cahan Holdinq"ə məxsus ENNA MMC məhkəməlik olub.
Sumqayit.tv Qaynarinfo.az-a istinadən xəbər verir ki, şirkət barəsində ilk dəfə Dövlət Gömrük Komitəsi tərəfindən İnzibati Xətalar Məcəlləsinin 485.2-ci (Mallar və nəqliyyat vasitələri gətirilərkən və ya aparılarkən müvafiq icra hakimiyyəti orqanına məlumatın verilməməsi və ya təhrif olunmuş məlumatın verilməsi, yaxud əvvəlcədən qısa idxal bəyannaməsinin verilməməsi) maddəsi ilə inzibati protokol tərtib edilib.
Protokola Naxçıvan Şəhər Məhkəməsində Gülsüm Əliyevanın sədrliyi ilə baxılacaq. İddia təsdiqini taparsa, şirkət rəhbərliyi cərimə olunacaq.
Qeyd edək ki, "Cahan Holdinq"ə məxsus ENNA zavodunda ildə 250 milyon içki istehsal olunur. Şirkətin elektron saytında qeyd edilir ki, 2022-ci ildə ilk dəfə enerji içkisi istehsal edilir. Amma AQTA-nın apardığı yoxlama zamanı bəlli olub ki, ENNA MMC tərəfindən istehsal edilən "Plus Power” enerji içkisi deyil.
Onu da qeyd edək ki, MMC-nin qanuni təmsilçisi Murad Həbib oğlu Məmmədovdur.