Qərbi Azərbaycanın Gorus rayonunun Qurdqalaq Kənd İcması Qurban Bayramı münasibətilə xeyriyyə xarakterli tədbir həyata keçirib.                Sumqayit.tv xəbər verir ki, aksiya kənd icmasının təşəbbüsü və sakinlərin iştirakı ilə reallaşıb.

Qurban Bayramının mənəvi dəyərini əks etdirən şəkildə qurbanlıq heyvanlar kəsilərək, ət paylaması təşkil olunub. Yardımlar əsasən aztəminatlı ailələrə, ahıl və tənha şəxslərə çatdırılıb. Təşkilatçılar bu təşəbbüslə həm də icma daxilində qarşılıqlı hörmət və həmrəyliyi möhkəmləndirməyi hədəfləyiblər.

Tədbirin davamında, kənd sakinləri və icma üzvləri Seyid Əhəd Məmmədovun ocağında bir araya gələrək bayramlaşma mərasimi keçiriblər. Görüş zamanı ata-babadan miras qalan adət-ənənələrin yaşadılması və Qərbi Azərbaycana qayıdış mövzuları ətrafında fikir mübadiləsi aparılıb. Şəhidlərin ruhuna dualar oxunub, Azərbaycana sülh və firavanlıq arzulanıb.

Sonda məlum təşəbbüs kənddə həm dini, həm də ictimai dəyərlərin yaşadılmasına xidmət etməklə yanaşı, gələcək nəsillər üçün də örnək olan bir birlik nümunəsi kimi dəyərləndirilib.