"Azərbaycan Dəmir Yolları" QSC (ADY) Şimal–Cənub Beynəlxalq Nəqliyyat Dəhlizinin inkişafı və bu marşrut üzrə yükdaşımaların həcmini artırmaq məqsədilə ölkə ərazisində genişmiqyaslı infrastruktur yenilənməsi həyata keçirir.

Cəmiyyətdən Sumqayit.tv-yə verilən məlumata görə, bu istiqamətdə ən mühüm layihələrdən biri olan Sumqayıt–Yalama dəmir yolu xəttinin layihələndirilməsi və tikintisi 2020-ci ildən etibarən icra olunur. Layihənin bu il – 2025-ci ildə tam başa çatdırılması planlaşdırılır.

ADY-nin Sumqayıt.tv-in sorğusuna cavabında bildirilib ki, artıq layihələndirmə mərhələsi tam yekunlaşıb,
xəttin birinci və ikinci hissəsi üzrə tikinti-quraşdırma işlərinin 96 faizi tamamlanıb.

Yeni dəmir yolu xəttinin ümumi uzunluğu 333,69 km, yan yollarla birlikdə isə 362,12 km təşkil edir.

Layihə çərçivəsində:

157 körpü,

16 heyvan keçidi,

13 piyada üst keçidi və digər mühəndis qurğuları inşa edilir.

Bundan əlavə, Yalama-2 stansiyasının tikintisi də nəzərdə tutulur. Stansiya Rusiya ilə sərhəddə, mövcud Yalama stansiyasına yaxın ərazidə yerləşəcək və strateji əhəmiyyət daşıyacaq.

Layihə çərçivəsində həmçinin Yeni Ələt stansiyasının yenidən qurulması və genişləndirilməsi də planlaşdırılıb.

3-11-2025, 17:59 94