Zəfər Gününün beşinci ildönümü münasibətilə Sumqayıt şəhərində hərbi yürüş təşkil olunacaq.

Sumqayit.tv xəbər verir ki, Müdafiə Nazirliyinin təsdiq etdiyi plana əsasən, yürüş noyabrın 6-da saat 10:00-dan 12:00-dək şəhərin Dənizkənarı Bulvarı ərazisində keçiriləcək.

Tədbir Azərbaycan Ordusunun döyüş ruhunun, xalqın birliyinin və müzəffər Zəfərin beşinci ildönümünün rəmzi kimi təşkil olunur. Hərbi orkestrin müşayiəti ilə keçiriləcək yürüşdə hərbi qulluqçular, orkestr heyəti və müxtəlif qoşun növlərinin nümayəndələri iştirak edəcək.

Bu yürüş təkcə bir tədbir deyil — 44 günlük Vətən müharibəsində qazanılan tarixi qələbənin və xalqımızın birliyinin simvoludur.
Beş il öncə – 2020-ci ilin noyabrında Azərbaycan xalqı 30 ilə yaxın işğalda qalan torpaqlarını azad etməklə yeni bir dövrə qədəm qoydu.

Sumqayıt sakinləri üçün bu yürüş, həm də Zəfərin qəhrəmanlarına ehtiram və gələcək nəsillərə vətənpərvərlik nümunəsi kimi xüsusi əhəmiyyət daşıyır.

4-11-2025, 19:09 107