Türk dövlətlərinin Vəkillər Kollegiyaları Birliyinin yaradılması istiqamətində mühüm addımlar atılır

Yaxın gələcəkdə Türk dövlətlərinin Vəkillər Kollegiyaları Birliyi yaradıla bilər. Bu təşəbbüs türk dövlətləri arasında hüquqi əməkdaşlığın gücləndirilməsini və ortaq hüquq platformasının formalaşdırılmasını nəzərdə tutur.

Sumqayit.tv xəbər verir ki, bu barədə məlumat Azərbaycan Vəkillər Kollegiyasında Türkiyənin Eskişehir Barosunun rəhbəri Barış Günaydının başçılıq etdiyi nümayəndə heyəti ilə keçirilən görüşdə səsləndirilib.

Görüşü açan Vəkillər Kollegiyasının sədri Anar Bağırov, Azərbaycan ilə Türkiyə arasında mövcud qardaşlıq və dostluq münasibətlərinin hüquq sahəsində də getdikcə dərinləşdiyini bildirib. O, kollegiyada həyata keçirilən islahatlar, institusional inkişaf və beynəlxalq əməkdaşlıq istiqamətində görülən işlərdən danışıb.

Anar Bağırov, ötən il Ankara şəhərində keçirilən Türk dünyası vəkillər kollegiyalarının zirvə görüşünü xatırladaraq, həmin tədbirdə imzalanan niyyət bəyannaməsinin əməkdaşlığın güclənməsinə mühüm töhfə verdiyini qeyd edib.

Görüş zamanı Sumqayıt Regional Vəkil Bürosu ilə Eskişehir Barosunun qardaşlaşmış büro elan edilməsi təklifi irəli sürülüb. Kollegiya sədri bu ideyanı yüksək qiymətləndirərək, qarşılıqlı əlaqələrin və təcrübə mübadiləsinin daha da genişlənməsinin vacibliyini vurğulayıb.

Eskişehir Barosunun rəhbəri Barış Günaydın isə səmimi qəbula görə təşəkkürünü bildirib və gələcəkdə iki qurum arasında birgə təlim və seminarların təşkilinə ümidvar olduğunu deyib.

Görüş iştirakçıları arasında fikir mübadiləsi aparılıb, xatirə hədiyyələri təqdim olunub və gələcək əməkdaşlıq istiqamətləri müzakirə edilib.

4-11-2025, 19:16 116