Sumqayıt şəhər İcra Hakimiyyətinin başçısı Zakir Fərəcov 4-cü mikrorayonda növbəti səyyar qəbul keçirib.
Sumqayit.tv xəbər verir ki, tədbirdə icra hakimiyyətinin məsul şəxsləri, dövlət qurumlarının nümayəndələri, müəssisə rəhbərləri, şəhid ailələri, qazilər və yerli sakinlər iştirak ediblər.

Görüş zamanı şəhər rəhbəri sakinləri fərdi qaydada dinləyib, onların müraciət və təkliflərini diqqətlə qeydiyyata alıb. Qaldırılan məsələlər əsasən sosial təminat, mənzil-məişət çətinlikləri, məşğulluq və kommunal problemlərlə bağlı olub. Şikayətlərin bir qismi elə yerindəcə həll edilib.

Əlavə araşdırma tələb edən müraciətlərlə bağlı Zakir Fərəcov aidiyyəti qurumların rəhbərlərinə konkret tapşırıqlar verib. O, vətəndaş müraciətlərinin qanunvericiliyə uyğun, operativ və şəffaf şəkildə icra olunmasının vacibliyini xüsusi vurğulayıb.

Qeyd edək ki, Sumqayıt Şəhər İcra Hakimiyyəti sakinlərlə birbaşa ünsiyyəti gücləndirmək və problemlərin yerində həlli üçün səyyar qəbul və görüşləri mütəmadi olaraq təşkil edir. Bu tədbirlər vətəndaş məmnunluğunun artırılmasına xidmət edir.

12-12-2025, 11:03 120